A
VÍA RÁPIDA, CONSTATACIÓN DA DEFICIENTE DEMOCRACIA
Son
malos tempos para a democracia, nunca peores dende o remate da
dictadura franquista. Un clamor xeralizado do que a cidadanía pareceu
decatarse despois da burla que supuxo para as xentes da Galiza o
comportamento das institucións públicas no desastre do Prestige, ou
para as do estado a vergoña de verse implicados na invasión violenta
dun país alleo, en defensa dos intereses imperialistas do opulento
capital yanki.
Manifestación
do pasado mes de novembro en demanda de responsabilidades pola catástrofe
do Prestige.
Foi
en gran número que as xentes deste país, e por suposto desta comarca
do Morrazo, fixemos oir as nosas voces de fastío, repulsa, cabreo e
ata repugnancia ante as actitudes prepotentes, indignas, autoritarias
e insultantes dos gobernantes que, quen o diría, ocupaban os seus
cargos por mandato democrático. Os mesmos gobernantes que coa mesma
prepotencia, indignidade e autoridade impuxeron no Morrazo unha nova
estrada á que lle chamaron vía rápida, corredor ou vía de alta
capacidade, (agora será simple vía para automóbiles), transgredindo
os procedementos democráticos e burlándose da cidadanía do Morrazo,
anque curiosamente, aquí as voces de repulsa contra as violacións
dos principios democráticos, quedaron afogadas polas
de complacencia, loubanza e incluso cooperación para levar a
cabo a maior agresión e ocupación do territorio en beneficio dos
intereses do capital especulador.
Queda
cuestionada a democracia deste país, cando os procedementos de
salvagarda do sistema son burlados pola autoridade que debe
garantilos. Se a Lei obriga a que este tipo de obras inclúa un
Estudio de Impacto Ambiental, é precisamente para protexer o
territorio e os seus valores ecolóxicos, culturais ou históricos. Se
dito estudio faise de trámite, sen rigor, por cubrir o expediente,
estamos ante unha administración sen vontade de protexer os valores
do país, sen vontade de cumprir a Lei, estamos ante unha administración
antidemocrática. Non lle interesa protexer os bens públicos ante os
intereses dos negocios privados.
Como
constatación deste feito, as diversas deficiencias do estudio de
impacto ambiental por nós denunciadas entre as que podemos citar as
referidas ás augas e ao patrimonio. Non se facía referencia a como
ía afectar a obra ás augas, non se fixo ningún estudio de
mananciais, traídas ou regos. Os efectos desta carencia xa se están
a comprobar hoxe e aínda están por ver as verdadeiras consecuencias.
Augas
que baixan do corredor abrindo
camiño
e destragando cultivos.
No
apartado de patrimonio histórico dicíase no estudio que non había
ningún xacemento afectado polo trazado, e ningún concello do Morrazo
alegou nada en contra. Tiveron que recoñecer a afección a 31
xacementos arqueolóxicos e a destrucción de 13 deles, tralas
denuncias da Plataforma Anti-Vía Rápida, aínda que ese recoñecemento
non supuxo variacións de trazado para salvar eses elementos do
patrimonio histórico, a pesares de que a Constitución Española da
prioridade á protección ambiental e cultural sobre a política económica
(Art. 45 e 46).
O que queda do Petroglifo de Gondarán (Cangas). Era Ben de Interese
Cultural, catalogado e protexido pola Lei.
Non
quedan aí no seu afán de abuso e violación da legalidade. Impóñense
unhas modificacións necesarias para poder aprobar a Declaración de
Impacto Ambiental, saen publicadas no DOG, e logo ignóranse e non se
trasladan ao proxecto. É a maior constatación da violación de
principios democráticos fundamentais, da inutilidade dos procesos de
control democrático cando o sistema esta corrupto, e do desamparo en
que nos atopamos os cidadáns, incluso chegando coas nosas denuncias a
toda institución que se poida recurrir.
Pero
non só pisotean os dereitos dos que nos opuxemos a esta obra. Búrlanse
da poboación enteira, pois coa manipulación da información e a
utilización de todo o seu poder de propaganda, deixan ao cidadán
indefenso. O control da información fai que se difundan ata chegar a
asumirse as ideas que eles queren que asumamos. Consiguen que non se
cuestione a vía rápida e incluso que se demande, porque ben se
coidan de non falar doutras alternativas para mellorar a mobilidade,
xustamente as que se aplican hoxe nos paises avanzados. Ocultan a
información para evitar a reflexión e as posturas racionais ou críticas,
facendo así que aceptemos encantados o modo de desprazamento máis
caro e ineficaz. Cremos que o coche nos da liberdade pero estamos nas
súas mans.
Atascos á entrada das vilas,
que
non resolverá este corredor.
Promoven
unha cultura de culto ao consumo na que o coche é elemento
imprescindible porque aí están os grandes intereses das maiores
empresas do país. Nin lles importan as cen vidas que se perden cada
semana nas estradas,... non veremos reducir a publicidade de coches
que fan incluso alarde da súa potencia, nin obrigarán a levar un
letreiro no capó que diga: “Este coche mata”. Esa é a grande
corrupción dun sistema que non resolve os verdadeiros problemas, se a
solución implica reducir os enormes beneficios das grandes empresas.
Son
eles, a grande empresa, a que goberna o país sen presentarse ás
eleccións. Entón,... ¿a quen estamos a votar cada catro anos? ¿É
isto democracia?
Luís Pérez González
Plataforma Anti-Vía Rápida do Morrazo
|